Arestado ang 179 indibidwal sa mas pinaigting ng malawakang operasyon ng Eastern Police District sa loob lamang ng isang linggo, mula noong Marso 8-14, 2025.
Ayon kay Police Colonel Villamor Q Tuliao, Acting District Director ng EPD, may 58 na Wanted Persons ang naaresto, kabilang na ang 11 Top Most Wanted Person, 6 Most Wanted Person at 41 iba pang wanted na indibidwal.
Ayon pa kay PCol Tuliao, sa kampanya kontra iligal na droga naman ay may 41 na operasyon ang ikinasa ng kapulisan kung saan 61 na drug personalities ang nabitag, 267.35 gramo ng shabu at 66.2 gramo ng marijuana ang nasamsam kabilang na ang iba pang drug paraphernalia na abot sa Php1,826,464 ang halaga.
Gayundin sa kampanya ng EPD laban sa iligal na pagsusugal, 59 indibidwal na lumabag dito ang naaaresto at Php11,365.00 bet money ang nakumpiska sa isinagawang 31 operasyon ng pulisya.
Kaugnay din ito sa nalalapit na NLE 2025, mas pinaigting pa ng kapulisan ang kanilang COMELEC Checkpoint sa buong Metro East lalo na ang kampanya laban sa loose firearms o iligal at hindi lisensyadong baril, isa ang naaresto sa kasong paglabag sa Omnibus Election Code (Election Gun-Ban) matapos makuhaan ng isang unit na baril. Samantala, limang iba pang baril ang naiturn over sa kapulisan.
“Ang ating kapulisan ay patuloy ang pakikipaglaban at ginagampanan ang kanilang tungkulin na ipatupad ang batas para sa kaligtasan, kaayusan, at kapayapaan sa aming apat na lungsod. Saludo ako sa ating kapulisan dahil sa matagumpay na isang linggong operasyon na nagresulta sa pagkadakip ng mga taong lumabag sa batas. Ito’y sumasalamin na sa kabila ng kaliwa’t kanang problema ng ating lipunan ay nanatili kami sa aming hangarin na gampanan ang aming tungkulin ng may dedikasyon at integridad para sa bayan,” dagdag ni PCol Tuliao.
Source: EPD PIO
