Arestado sa ikinasang intelligence-driven ng mga tauhan ng Taguig City Police ang isang High Value Individual (HVI) at nakumpiska ang hinihinalang shabu at marijuana bandang alas 10:00 ng gabi noong Marso 12, 2025, sa kahabaan ng Kalamunggay Street, Barangay Western Bicutan, Taguig City.
Kinilala ni Police Brigadier General Manuel Abrugena, District Director ng Southern Police District, ang suspek na si alyas “Edwin,” isang 60-anyos na lalaki at residente ng No. 15A Kalamunggay Street, Barangay Western Bicutan, Taguig City.
Nasamsam mula sa suspek ng Station Drug Enforcement Unit (SDEU) ng Taguig CPS, ang walong heat-sealed transparent plastic sachets na naglalaman ng pinaniniwalaang shabu, na may kabuuang bigat na humigit-kumulang 136.2 gramo at may Standard Drug Price na Php926,160, isang heat-sealed transparent plastic sachet na naglalaman ng hinihinalang tuyong marijuana leaves at fruiting tops, na may bigat na mga 21.3 gramo at may SDP na Php2,556 at ang perang ginamit sa iligal na transaksyon.
Sasampahan naman ng mga kasong paglabag sa Sections 5 at 11, Article II ng Republic Act 9165 o “Comprehensive Dangerous Drugs Act of 2002” ang nadakip na suspek.
“Ang operasyong ito ay nagpapakita ng aming patuloy na pagsisikap upang malinis ang ating mga komunidad mula sa mga delikadong substance. Patuloy kaming magtatrabaho upang matukoy at matanggal ang mga drug networks at tiyakin ang kaligtasan ng ating mga mamamayan,” pahayag ni PBGen Abrugena.
Source: SPD PIO
Panulat ni PMSg Remelin M Gargantos
