Timbog ang dalawang Street Level Individuals sa ikinasang anti-illegal drugs operation ng mga operatiba sa Barangay Wakas, Bocaue, Bulacan nito lamang Marso 1, 2025.
Kinilala ni Police Lieutenant Colonel Manuel C De Vera Jr., Chief of Police ng Bocaue Municipal Police Station, ang mga suspek na sina alyas “Jonjon”, 36 anyos at alyas “Hapon”, 30 anyos, parehong residente ng Barangay Batia, Bocaue, Bulacan.
Bandang 1:30 ng madaling araw nang ikasa ang operasyon ng mga tauhan ng Bocaue Municipal Police Station-Station Drug Enforcement Unit.
Nakumpiska sa mga suspek ang 12 pakete ng hinihinalang shabu na may tinatayang timbang na 131.17 gramo na nagkakahalaga ng Php891,956, isang Php1000 bill na ginamit bilang buy-bust money, mga drug paraphernalia at isang caliber .38 revolver na walang serial number at limang buhay na bala.
Kasong paglabag sa Section 5, 11 at 26 ng Republic Act 9165 o “Comprehensive Dangerous Drugs Act of 2002” at RA 10591 kaugnay ng Omnibus Election Code (Gun Ban) ang kakaharapin ng suspek.
Ang tagumpay ng operasyong ito ay resulta ng mas pinaigting na kampanya ng Bulacan PNP, sa pakikipagtulungan ng iba’t ibang ahensya ng gobyerno, laban sa ilegal na droga upang mapanatili ang kaayusan at kapayapaan sa kanilang nasasakupan.
Panulat ni Pat Jilly A Peña
