Nasakote ng Southern Police District Drug Enforcement Unit katuwang ang District Intelligence Division at Substation 3 ng Muntinlupa City Police Station, ang dalawang High Value Individual (HVI) sa isang buy-bust operation na nagresulta sa pagkakakumpiska ng mahigit Php2 milyong halaga ng shabu nito lamang Martes, Pebrero 25, 2025.
Kinilala ni Police Brigadier General Manuel J Abrugena, District Director ng SPD, ang mga suspek na sina alyas “Alice,” 46, babae, may-ari ng negosyo na naninirahan sa Muntinlupa City; at alyas “Alex,” 44, lalaki, seafarer na tubong Muntinlupa City.
Isinagawa ang nasabing operasyon bandang alas-2:10 ng madaling araw sa tabi ng isang hotel sa kahabaan ng National Road, Barangay Alabang, Muntinlupa City na nagresulta sa pagkakasamsam ng tatlong knot-tied transparent plastic pack na naglalaman ng pinaniniwalaang shabu na humigit-kumulang 300 gramo ang bigat na nagkakahalaga ng Php2,040,000, buy-bust money, isang Android mobile phone, isang yellow-green eco bag na may label na “Crocs”, at iba pang drug paraphernalia.
Mahaharap sa kasong kriminal ang mga naarestong suspek dahil sa paglabag sa Section 5 (Sale of Dangerous Drugs), Section 11 (Possession of Dangerous Drugs), at Section 26 in relation to Section 5 (Conspiracy to Sell Dangerous Drugs) ng Article II ng Republic Act 9165 (Comprehensive Dangerous Drugs Act of 2002).
“Ang matagumpay na operasyong ito ay sumasalamin sa aming pangako sa pag-alis ng mga ilegal na droga sa aming mga komunidad. Patuloy nating hahabulin ang mga sangkot sa kalakalan ng droga upang matiyak ang kaligtasan at kagalingan ng ating mga mamamayan,” ani PBGen Abrugena.
Source: SPD PIO
Panulat ni PMSg Remelin M Gargantos
