Nasabat ang mahigit Php200,000 halaga ng pinaghihinalaang shabu sa isang buy-bust operation ng mga otoridad sa Purok Luan, Barangay Lun Masla, Malapatan, Sarangani Province noong Pebrero 24, 2025.
Kinilala ni Police Major Lloyd Kevin D Caigas, Hepe ng Malapatan Municipal Police Station, ang suspek na si alyas “Jolas,” 40 anyos, tinuturing na Street Level Individual, at residente ng Barangay Tuyan, Malapatan, Sarangani.
Nakumpiska mula sa suspek ang limang piraso ng heat-sealed plastic sachet na naglalaman ng pinaghihinalaang shabu na may tinatayang kabuuang bigat na 30.2 gramo at may Standard Drug Price (SDP) na Php205,360, isang yunit ng .38 caliber revolver na walang serial number at isang pirasong Php1,000 bill na ginamit bilang buy-bust money.
Kasong paglabag sa Section 5 at 11 ng Republic Act 9165 o “Comprehensive Dangerous Drugs Act of 2002” at RA 10591 o “Comprehensive Firearms and Ammunition Regulation Act” ang kakaharapin ng suspek.
Patuloy ang pinaigting na kampanya ng PNP at PDEA laban sa iligal na droga sa rehiyon tungo sa isang maunlad na Bagong Pilipinas.
