Nakumpiska ng mga awtoridad ang mahigit Php510,000 halaga ng shabu mula sa dalawang suspek sa ikinasang buy-bust operation sa Maharlika Highway, Barangay Sumacab Este, Cabanatuan City, Nueva Ecija nito lamang Sabado, ika-22 ng Pebrero 2025.
Kinilala ni Police Colonel Ferdinand D Germino, Provincial Director ng Nueva Ecija Police Provincial Office, ang mga naarestong suspek na sina alyas “Omba”, 34 taong gulang, at alyas “Sheena”, 20 taong gulang, parehong residente ng Caloocan City.
Naging matagumpay ang operasyon ng mga tauhan ng Cabanatuan City Police Station-Station Drug Enforcement Unit (CCPS-SDEU) sa nasabing operasyon.
Nakumpiska mula sa mga suspek ang marked money, dalawang heat-sealed transparent plastic sachets na naglalaman ng hinihinalang shabu na may bigat na 75 gramo at may Standard Drug Price na Php510,000, at cellphone.
Nahaharap sa kasong paglabag sa Republic Act 9165 o “Comprehensive Dangerous Drugs Act of 2002” ang mga suspek.
Patuloy ang Nueva Ecija PNP sa pagpapaigting ng kampanya kontra ilegal na droga upang mapanatili ang kapayapaan at seguridad sa kanilang nasasakupan.
Panulat ni Pat Jilly A Peña
