Arestado ang isang indibidwal sa kasong pagbebenta ng ilegal na droga sa isinagawang buy-bust operation ng mga tauhan ng Police Station 4 ng Santiago City Police Office sa Purok 4, Naggasican, Santiago City noong ika-19 ng Pebrero 2025.
Kinilala ni Police Major Hassan Nor Damac, Acting Station Commander ng Police Station 4, ang suspek na si alyas “Jay”, nasa hustong edad, walang asawa at residente ng Purok 3, Mabini, Santiago City.
Matagumpay na naisakatuparan ang naturang operasyon ng pinagsamang pwersa ng Station Drug Enforcement Unit ng Police Station 4 (lead unit), CIU-SCPO and PDEA Quirino Police Office at sa pakikipag-ugnayan sa PDEA-PRO2.
Bukod sa nabiling ilegal na droga na mayroong timbang na 1.4 gramo at nagkakahalaga ng Php9,520, nakuha rin mula sa pag-iingat ng suspek ang pinaghihinalaang buy-bust money at isang yunit ng Samsung keypad na kulay itim.
Ang suspek ay nahaharap sa kasong paglabag sa Republic Act 9165 o Comprehensive Dangerous Drugs Act of 2002.
Ang kapulisan ng lungsod ng Santiago ay patuloy na susupilin ang kriminalidad na may kaugnayan sa ilegal na droga, sa aktibong suporta at pakikipagtulungan ng mamamayan para sa isang ligtas at mapayapang Lungsod.
Source: Presinto kuwarto
Panulat ni Patrolman Erwin Calaus
