Kumpiskado ng mga awtoridad ang isang unit ng baril at mga bala sa isang lalaki sa isinagawang Oplan Kapkap sa Purok 5, Barangay Osias, Kabacan, Cotabato nito lamang ika-11 ng Pebrero 2025.
Kinilala ni Police Lieutenant Colonel Miredel R Calinga, Officer-In-Charge ng Kabacan Municipal Police Station, ang suspek na si alyas “Sam”, 26 anyos, tricycle driver at residente ng Barangay Balong, Pikit, Cotabato.
Bandang 11:00 ng gabi nagsagawa ang nasabing istasyon ng ronda patrol at kapkap bakal sa nasabing lugar at nakumpiskahan ang suspek ng isang unit ng caliber 45 na pistol, magasin, at mga bala samantala bigong magpakita ng kaukulang dokumento ang suspek kaya agad itong inaresto.
Nahaharap sa kasong paglabag sa Republic Act 10591 o “Comprehensive Firearms and Ammunition Regulation Act” at paglabag sa Omnibus Election Code ang suspek.
Patuloy ang pagsasagawa ng PNP ng kampanya laban sa mga loose firearms. Mahigpit na ipinagbabawal ang pagdadala ng hindi lisensyadong baril at mahigpit din na ipapatupad ang gun ban para sa mas maayos at tahimik na halalan.
Panulat ni Patrolwoman Vina C. Morales
