Nasabat ng mga operatiba ng Pampanga PNP at arestado ang isang High Value Individual sa ikinasang buy-bust operation sa Barangay San Jose, Magalang, Pampanga nito lamang Martes, ika- 4 ng Pebrero 2025.
Kinilala ni Police Colonel Jay C Dimaandal, Provincial Director ng Pampanga Police Provincial Office, ang naarestong suspek na si alyas “Ben”, 30 taong gulang, at residente ng Old Manggahan, San Isidro, Angono, Rizal.
Naging matagumpay ang operasyon ng mga tauhan ng Magalang Municipal Police Station, katuwang ang Philippine Drug Enforcement Agency Region 3 (PDEA 3) sa nasabing operasyon.
Nakumpiska mula sa suspek ang marked money, anim na heat-sealed transparent plastic sachets na naglalaman ng hinihinalang shabu na may tinatayang bigat na 410 gramo at may Standard Drug Price na Php2,788,000, pulang maliit na bag at cellphone.
Amg suspek ay nahaharap sa kasong paglabag sa Republic Act 9165 o “Comprehensive Dangerous Drugs Act of 2002”.
Patuloy ang Pampanga PNP sa pagpapaigting ng kanilang kampanya kontra ilegal na droga upang mapanatili ang kapayapaan at seguridad sa kanilang nasasakupan.
Panulat ni Pat Jilly A Peña
