Tinatayang Php472,000 halaga ng Fully Grown Marijuana Plants ang binunot at sinunog ng mga operatiba ng Benguet PNP sa isinagawang marijuana eradication sa Kibungan, Benguet nito lamang ika-4 ng Pebrero 2025.
Ayon kay Police Colonel Joseph P Bayongayasan, Provincial Director ng Benguet Police Provincial Office, matagumpay ang operasyon dahil sa pagtutulungan ng mga operatiba sa pangunguna ng Kibungan Municipal Police Station katuwang ang Provincial Drug Enforcement Unit at Provincial Intelligence Unit ng Benguet PPO, Regional Intelligence Division, Police Regional Office-Cordillera at Philippine Drug Enforcement Agency-Cordillera.
Nagresulta ang operasyon sa pagkadiskubre ng tatlong plantasyon na may kabuuang lawak na 420 square meters na may tanim na mahigit kumulang 2,360 piraso ng Fully Grown Marijuana Plants at may Standard Drug Price na Php472,000.
Bagamat walang nahuling cultivator, binunot at sinunog ng mga operatiba ang pinagbabawal na tanim sa mga mismong lugar.
Ang matagumpay na operasyon ay patunay lamang na ang Pambansang Pulisya ay kaisa sa pagpapaigting ng kampanya kontra illegal na droga bilang pagsuporta sa adhikain ng kasalukuyang administrasyon tungo sa isang Bagong Pilipinas.
