Pormal nang inilunsad ng Police Regional Office (PRO) 13 ang KADIWA ng Pangulo para sa Masaganang Bagong Pilipinas sa isang seremonya na ginanap sa Camp Col Rafael C Rodriguez, Libertad, Butuan City nito lamang Enero 31, 2025.
Pinangunahan ng Department of Agriculture (DA) Regional Executive Director Arlan M. Mangelen ang pagbubukas ng programa, matapos aprubahan ang kahilingan ni PRO 13 Director Police Brigadier General Christopher N. Abrahano na makipagtulungan sa layuning palakasin ang direktang koneksyon sa pagitan ng mga lokal na magsasaka at mga mamimili.
Ang KADIWA ng Pangulo ay pangunahing programa ni Pangulong Ferdinand R. Marcos, Jr. na naglalayong palakasin ang seguridad sa pagkain sa pamamagitan ng isang Whole-of-Governemnt Approach para sa mas malawakang pagpapatupad sa buong bansa.
Dumalo rin sa programa sina Atty. Jason P. Balais, Regional Director ng Department of Labor and Employment (DOLE) Caraga, kasama ang kanyang mga kawani; Ms. Mae-J R. Ruayana, Market Specialist II mula sa DA, kasama ang iba pang mga kinatawan; ang PRO 13 Command Group; mga opisyal at kawani ng pulisya; at iba pang mga empleyado ng PRO 13.
Katuwang sa programa ang iba’t ibang grupo ng magsasaka, kabilang ang Sumilihon-Taguibo Farmers Association, Km. 7 Farmers Producers Cooperative, Cebu People’s Multi-Purpose Cooperative, De Oro Agrarian Beneficiary Cooperative, San Antonio Integrated Farmers Multi-Purpose Cooperative, at Kipundao Farmers Multi-Purpose Cooperative.
“Together, let us continue supporting our local producers and promoting economic stability. This is a step forward in our shared vision of a Masaganang Bagong Pilipinas,” ani PBGen Abrahano.
Panulat ni Pat Karen Mallillin
