Isinagawa ang isang Mass Withdrawal of Support ng 15 tagasuporta ng Communist Terrorist Group (CTG) sa Zamboanga Sibugay Police Provincial Office nito lamang ika-31 ng Enero 2025.
Pinangunahan ito ni Engr. Venancio A. Ferrer III, Focal Person ng PTF-ELCAC Zamboanga Sibugay, at ni Police Colonel Barnard Danie V. Dasugo, Provincial Director ng Zamboanga Sibugay Police Provincial Office.
Ang mga dating tagasuporta ng CTGs ay nagsilbing couriers at nagbibigay ng mahahalagang suplay ng pagkain at iba pang pangangailangan sa mga miyembro ng grupo.
Subalit, napagpasyahang bumalik sa ilalim ng batas, tahakin ang landas ng kapayapaan, at bigyang pagkakataon ang mas maliwanag na kinabukasan para sa kanilang pamilya.
Sa naging talumpati ni Engr. Ferrer III, nagpahayag ng kanyang papuri sa mga dating CTG supporters dahil sa kanilang matapang na desisyon. Ipinunto rin nito ang iba’t ibang programa ng gobyerno na maaaring makatulong sa kanila, tulad ng kabuhayan, serbisyong pangkalusugan, at iba pang suporta na makakatulong sa kanilang pagbangon.
Pinangunahan ni Police Colonel Dasugo ang panunumpa ng katapatan at muling pinagtibay ang dedikasyon ng Zamboanga Sibugay PNP sa paglaban sa insurhensiya tungo sa pagkamit ng kapayapaan at kaunlaran.
