Arestado ang isang High Value Individual (HVI) at ang kasabwat nitong menor-de-edad matapos makumpiskahan ng nasa mahigit Php300,000 halaga ng hinihinalang shabu sa Barangay Silway, Polomolok, South Cotabato nito lamang ika-19 ng Enero 2025.
Ayon sa ulat ng Regional Police Drug Enforcement Unit (RPDEU) 12, dinakip ang mga suspek na sina alyas “Dan” (HVI) at ang kasabwat nitong si alyas “Jane” sa ikinasang buy-bust operation ng RPDEU 12 (lead unit), PNP Drug Enforcement Group-Special Operations Unit 12, Regional Intelligence Division 12 at Polomolok Municipal Police Station.
Nahuli ang mga suspek matapos mabentahan ang isang police poseur buyer ng isang Php500 bill at apat na pekeng Php500 bill na ginamit bilang buy-bust money.
Tinatayang aabot sa 50.4 gramo ng hinihinalang shabu na may Standard Drug Price na Php342,720 ang nasabat sa dalawang suspek.
Nahaharap ang dalawa sa kasong paglabag sa Republic Act 9165 o “Comprehensive Dangerous Drugs Act of 2002”.
Pinuri naman ni Police Brigadier General Arnold P Ardiente, Acting Regional Director ng Police Regional Office 12, ang matagumpay na operasyon at mas pinahusay na Anti-Illegal Drugs Operation ng mga operating units na naglalayong masugpo ang kalakalan ng iligal na droga sa kanilang nasasakupan tungo sa mas ligtas at maayos na pamayanan.
Panulat ni Pat Khernwin Medelin
