Arestado ang isang indibidwal dahil sa pagsuot ng PNP Uniform sa loob mismo ng Camp Fermin G Lira Jr, Barangay Dadiangas West, General Santos City nito lamang Enero 13, 2025.
Kinilala ni Police Colonel Nicomedes P Olaivar Jr., City Director ng General Santos City Police Office, ang suspek na si alyas “Ed”.
Nahaharap sa kasong Usurpation of Authority at Illegal Use of PNP Uniform o Insignia ang suspek.
Nakatanggap ng ulat ang City Tactical Operation Unit (CTOU) ukol sa isang kahina-hinalang lalaki na gumagala sa naturang kampo at nakita ang suspek na suot ang PNP Bush Coat uniform (GOA “A”) na may dekoratibong mga award tulad ng IOBC pin, BISOC pin, Bagong Pilipinas pin, AGOS pin, at Public Safety Officers Advance Course pin habang may hawak na bull cup sa kaliwang kamay.
Hinuli ang suspek matapos masita na wala sa tamang bihis at bigong magpakita ng kanyang PNP valid ID.
Inamin naman ng suspek na ang kanyang mga dekoratibong award ay binili lamang sa online sa pamamagitan ng social media platforms tulad ng Shopee.
Nagbabala naman si PCol Olaivar Jr., sa mga sibilyan na hindi otorisado at labag sa batas ang pagsuot ng mga uniporme ng PNP at militar.
