Ipinatupad ang Commission on Elections (COMELEC) Checkpoint ng mga tauhan ng Police Regional Office Cordillera Administrative Region sa iba’t ibang bahagi ng region at sa kahabaan ng Quirino Highway, Barangay Irisan, Lungsod ng Baguio noong ika-12 ng Enero, 2025.
Pinangunahan ang aktibidad nina Police Brigadier General David Peredo Jr., Regional Director ng PRO Cordillera at Atty. Vannesa Roncal, Assistant Regional Director ng COMELEC-Cordillera.
Kasama sa operasyon ang Baguio City Police Office, COMELEC Baguio City, Highway Patrol Group, COMELEC Benguet Provincial Election Office, mga pulis mula sa iba’t ibang istasyon, Philippine Information Agency (PIA), at mga kinatawan ng media.
Nangangahulugan ang pagpapatupad ng checkpoint na nagsimula na ang election period at ang nationwide gun ban.
Layunin nito na mapanatili ang kapayapaan at seguridad sa panahon ng halalan, at maiwasan ang anumang karahasan.
Ayon sa COMELEC CAR at PRO CAR, ang mga checkpoint ay limitado lamang sa pagsusuri ng mga bagay na nakikita sa pamamagitan ng ‘plain view.’
Hinihikayat din ang publiko na makipagtulungan sa mga awtoridad upang maging maayos ang pagpapatupad ng mga checkpoint.
Ang aktibidad na ito ay bahagi ng mga hakbang ng COMELEC at PNP upang matiyak na magiging mapayapa at matiwasay ang panahon ng eleksyon.
