Matagumpay na naaresto ang isang Grade 7 student matapos mahulihan ng Php340K halaga ng hinihinalang shabu sa inilunsad na buy-bust operation sa Sitio Badjawan, Barangay Mambaling, Cebu City noong ika-7 ng Enero 2025.
Kinilala ni Police Major Efren Dela Cruz Diaz Jr., Station Commander ng Police Station 11, Cebu City Police Office, ang suspek na si alias “David”, 19 taong gulang, residente ng Sitio Naba, Barangay Mambaling, Cebu City.
Dakong alas-10:30 ng gabi nang magsagawa ng buy-bust operation ang operatiba ng Police Station 11 Drug Enforcement Unit, kung saan naaresto ang nasabing suspek.
Nakuha mula sa suspek ang 15 pakete ng hinihinalang shabu na aabot sa 50 gramo na may Standard Drug Price na Php340,000, itim na belt bag at transparent plastic na ginamit bilang lagayan ng mga iligal na droga at buy-bust money.
Mahaharap ang suspek sa kasong paglabag sa Section 5 at 11, Article II ng Republic Act 9165 o ang “Comprehensive Dangerous Drugs Act of 2002”.
Ang matagumpay na operasyon ay patunay lamang na ang Pambansang Pulisya ng Pilipinas ay nagpapakita ng kanilang kakayahan at kasanayan sa pagsugpo ng iligal na droga sa bansa at pagprotekta sa kaligtasan at kaayusan ng mamamayan para sa isang mapayapa na Bagong Pilipinas.
