Timbog ng mga tauhan ng Eastern Police District sa ikinasang buy-bust operation ang tinaguriang Top 9 High Value Individual ng National Capital Region Police Office sa kahabaan ng F. Pasco Avenue, Barangay Santolan, Pasig City nito lamang Martes, Enero 6, 2025.
Kinilala ni Police Colonel Villamour Q Tuliao, Officer-In-Charge ng EPD, ang naarestong suspek na si alyas “Bigboy”, 60 taong gulang, at residente ng Barangay Santolan, Pasig City.
Naisagawa ang operasyon sa pinagsanib na tauhan ng Pasig City Police Station Drug Enforcement Unit at Pasig City Anti-Drug Abuse Office (PCADAO), na nagresulta sa pagkakaaresto sa suspek at pagkakakumpiska ng walong pirasong heat-sealed transparent plastic sachets na naglalaman ng hinihinalang shabu na may tinatayang timbang na 57 gramo na may halaga na Php387,600.
Sasampahan ng kasong paglabag sa Seksyon 5 at 11, Artikulo II ng Republic Act 9165 o mas kilala bilang “Comprehensive Dangerous Drugs Act of 2002” ang suspek.
“Ang tagumpay na ito ay isang karangalan sa ating Police District. Ang personalidad ng droga na ito ay isang High Value Individual, at ang aming mga tauhan ay nagsikap na hulihin ang suspek; tinitiyak namin na siya ay mananagot sa kanyang mga krimen sa likod ng mga rehas,” ani PCol Tuliao.
Source: EPD PIO
