Dumarami na ang mga nagmamalimos sa bayan ng Coron sa Palawan dahilan upang mahigpit na ipinapatupad ang Anti-Mendicancy Law para mapanatili ang kaayusan, seguridad at kaginhawaan ng nasabing bayan nito lamang ika-20 ng Disyembre 2024.
Ikinasa ang operasyon para sa rescue ng mga namamalimos sa bayan ng Coron mula sa iba’t ibang lugar. Ang rescue operation ay pinangunahan ni Coron Mayor Mario Reyes katuwang ang PNP Coron, Coastguard, PNP Maritime Group, mga Barangay Officials, MSWDO, Traffic Enforcers at MDRRMO.
Ang mga na-rescue ay dinala pansamantala sa pasilidad ng LGU Coron at binigyan ng pagkain habang inaayos ang kanilang mga dokumentasyon upang makabalik sila sa kani-kanilang lugar.
Inamin ng alkalde na nakatanggap ito ng maraming reklamo mula sa mga turista tungkol sa maraming nagmamalimos sa lansangan ng Coron kung kaya’t nagpatawag ito ng pagpupulong upang ipatupad ang Presidential Decree No. 1563 o mas kilala bilang “Anti-Mendicancy Law” na may layuning pigilan ang paglaganap ng nagmamakaawa at pamamalimos sa mga pampublikong lugar.
Layunin nitong maprotektahan ang karapatan ng mga bata mula sa anumang uri ng kapahamakan at tiyakin na ang turismong bayan ng Coron ay mananatiling maayos.
Hinikayat ang lahat na makiisa sa ipinapatupad na batas at huwag magbigay ng limos sa mga lansangan at suportahan ang layunin ng Anti-Mendicancy Law.
Source: 104.7 XFM Palawan
Panulat ni Patrolwoman Ana Rose D Guadaña
