Arestado ng mga tauhan ng President Quirino Municipal Police Station ang isang lalaki matapos mahulihan ng hindi lisenyadong baril sa PNP Checkpoint sa COMPAC-2, Barangay Tuato, President Quirino, Sultan Kudarat nito lamang Disyembre 18, 2024.
Kinilala ni Police Major Joemari Y Chua, Hepe ng President Quirino MPS, ang arestadong suspek na si alyas “Benjie”, 22 anyos, may asawa, karpintrero, at residente Dimagil, Salam, Paglat, Maguindanao del Sur.
Naharang ang minamanehong motorsiklo ng suspek at napansin ng mga awtoridad ang nakasukbit na baril sa baywang nito at nang hanapan ng kaukulang dokumento ay wala itong naipakita kaya tuluyang inaresto ng pulisya.
Nakuha sa suspek ang isang yunit ng Cal. 45 pistol na baril na may kasamang magasin at siyam na bala.
Babala ng President Quirino PNP na huwag magdala ng baril o anumang armas na hindi otorisado at walang kaukulang dokumento dahil ito ay labag sa batas at may kaakibat na parusa.
