Nabigyan ng pamaskong handog ng Lagawe Municipal Police Station ang dalawang pamilya sa kanilang “Adopt a Family Program” noong Disyembre 13, 2024.
Pinangunahan ni Police Master Sergeant Roldan Palaguitang, sa ilalim ni Police Captain James Balog, Officer-In-Charge ng Lagawe MPS, ang pamamahagi ng mga pamaskong regalo sa mga benepisyaryo mula sa Burnay, Lagawe, Ifugao.
Nagkaloob ang pulisya ng mga grocery items, damit, at laruan upang matugunan ang pangunahing pangangailangan ng mga pamilya at mas maging masaya ang kanilang Pasko.
Ang “Adopt a Family Program” ay isang konkretong halimbawa ng pagsisikap ng PNP na lumabas sa kanilang tanggapan at direktang tumulong sa mga mamamayan, lalo na sa mga nangangailangan.
Labis ang pasasalamat ng mga benepisyaryo sa malasakit na ipinakita ng Lagawe PNP. Ang kanilang mga ngiti at pasasalamat ay nag-udyok sa mga pulis na patuloy na maglingkod sa kanilang mga kababayan.
Ang mga ganitong aktibidad ay nagpapalakas ng ugnayan sa pagitan ng pulisya at komunidad, at nagtataguyod ng isang kultura ng pagkakaisa at pagmamalasakit.
