Nakiisa ang Police Regional Office 2 sa kampanya ng National Task Force to End Local Communists Armed Conflict (NTF-ELCAC)—Situational Awareness and Knowledge Management (SAKM) cluster sa isinagawang Poster Making Contest sa Abarriongan National High School, Abarriongan, Sto Niño, Cagayan nito lamang Disyembre 6, 2024.
Naging posible ang aktibidad sa pangunguna ng National Intelligence and Coordinating Agency (NICA) Region 2 at sa pakikipagtulungan ng Local Government Unit ng Sto Niño, Cagayan, Department of Education at PRO2.
Ang nasabing aktibidad ay naglalayon na maipabatid at magkaroon ng kaalaman ang mga kabataan at estudyante patungkol sa mga estratehiya o taktika ng mga Communist Terrorist Groups (CTGs) upang maiwasan ang kanilang mga panlilinlang.
Naging makulay naman at aktibong nilahukan ng mga kabataang estudyante sa nasabing paaralan ang Educational and Information Awareness Campaign na may temang, “Bagong Kabataan sa Bagong Pilipinas Tungo sa Payapang Bukas at Buhay na Maunlad”.
Umabot naman sa 19 entries ang lumahok sa nasabing aktibidad, kung saan ang mga mananalo ay makakatanggap ng cash incentives bilang kanilang premyo.
Ayon din kay PMaj Sharon C Mallillin, OIC, RPIO ang poster-making contest ay naglalayon din na gamitin ang mga talento at kakayahan ng mga mag-aaral sa kanilang pakikilahok sa mga aktibidad na nagsusulong ng kapayapaan at nagtataguyod ng nasyonalismo sa bansa tungo sa isang maunlad na Bagong Pilipinas.
Source: PRO 2
Panulat ni PSSg Jeff John Nabasa
