Nasamsam ang tinatayang Php102,000 halaga ng hinihinalang shabu at naaresto ang dalawang lalaki sa ikinasang buy-bust operation ng Cotabato City PNP sa Purok Pembageran, Poblacion 9, Cotabato City, noong ika-5 ng Disyembre 2024.
Kinilala ni Police Colonel John Michael Mangahis, City Director ng Cotabato City Police Office, ang mga suspek na sina alyas “Kalong,” 23 anyos, mangingisda at alyas “Jahed,” 23 anyos, construction worker, kapwa residente ng Bulibod, Sultan Kudarat, Maguindanao del Norte.
Naging matagumpay ang operasyon ng City Police Drug Enforcement Unit, katuwang ang Police Station 1 at 2 ng CCPO at PDEA BARMM.
Nagresulta ito sa pagkakaaresto ng mga suspek matapos makabili ang isang poseur buyer ng isang heat-sealed transparent plastic sachet na naglalaman ng pinaniniwalaang shabu.
Ang nasamsam ay may timbang na 15 gramo at tinatayang nagkakahalaga ng Php102,000, buy-bust money na nagkakahalaga ng Php31,000, kabilang ang isang Php500 bill at 61 piraso ng boodle money na Php500.
Kasong paglabag sa Republic Act 9165 o “Comprehensive Dangerous Drugs Act of 2002” ang kinakaharap ng mga suspek.
Ang tagumpay ng operasyong ito ay patunay ng dedikasyon ng PNP sa pagsugpo sa ilegal na droga. Patuloy ang koordinasyon ng PNP katuwang ang ibang sangay ng pamahalaan upang tiyakin ang tagumpay ng operasyon. Layunin ng PNP na hindi lamang hulihin ang mga sangkot sa ilegal na droga kundi magbigay ng mas ligtas at maayos na pamayanan. Ang ganitong mga hakbang ay pagpapakita ng kanilang hangaring itaguyod ang kapayapaan at hustisya sa buong bansa.
Panulat ni Patrolwoman Ma. Señora Agbuya
