Nakiisa ang Rizal PNP sa isinagawang kampanya kontra karahasan sa kababaihan at mga bata na ginanap sa Barangay Gaggabutan West, Rizal, Cagayan noong ika-1 ng Disyembre 2024.
Bilang bahagi ng aktibidad, nagbigay si PSSg Romel Talay ng mahalagang talakayan ukol sa pag-iwas sa krimen at sa Republic Act 9165, ang Comprehensive Dangerous Drugs Act of 2002. Pinangunahan niya ang pagtalakay sa kahalagahan ng pagbabantay at aktibong pakikilahok ng komunidad sa pagpapanatili ng seguridad at kaayusan.
Pinangunahan naman ni PMSg Michelle Baloran ang sesyon ukol sa RA 9262 o Anti-Violence Against Women and their Children Act of 2004. Tinalakay ang iba’t ibang uri ng pang-aabuso, ang mga magagamit na mapagkukunan para sa mga biktima, at ang pangangailangan ng isang ligtas at suportadong kapaligiran sa loob ng mga pamilya at komunidad.
Samantala, binigyang diin naman ni Hon. Atty. Joel A. Ruma, Municipal Mayor ng Rizal sa kanyang mensahe ang kahalagahan ng pagkakaisa upang matuldukan ang karahasan sa kababaihan at mga bata. Pinagtibay din niya ang patuloy na suporta ng lokal na pamahalaan sa mga programang nagpoprotekta sa karapatan at kapakanan ng mamamayan.
Dagdag pa rito, nagpaabot ng pagsuporta si Police Major Sherwin C Viernes, Chief of Police ng Rizal Police Station, kung saan inihayag ang dedikasyon ng PNP sa pagtitiyak ng kaligtasan ng mga residente at hinikayat ang komunidad na aktibong makipagtulungan sa pagsugpo sa karahasan.
Layunin ng kampanya na palakasin ang kamalayan ng komunidad upang labanan ang karahasan at bigyang suporta ang karapatan ng mga kababaihan at bata. Ang matagumpay na inisyatibang ito ay nagiging inspirasyon para sa iba pang barangay na maglunsad ng kahalintulad na mga programa, na naglalayong lumikha ng mas ligtas, mas makatao, at mas maayos na komunidad para sa lahat.
Source: Rizal Police Station
Panulat ni Pat Jerilyn Colico
