Kumpiskado ang humigit Php13.5 milyong halaga ng droga sa dalawang indibidwal sa ikinasang anti-illegal drug buy-bust operation ng pinagsanib pwersa ng Roxas PNP at Philippine Drug Enforcement Agency – Oriental Mindoro sa Sitio Jamindang, Barangay Dangay, Roxas, Oriental Mindoro nito lamang ika-30 ng Nobyembre 2024.
Kinilala ang mga suspek na sina alyas “Jasper”, 29 anyos, welder, at residente ng Palompon, Leyte at alyas “Joseph”, 42 anyos, may asawa, at residente ng Taguig City.
Ang operasyon ay ikinasa ng PDEA Oriental Mindoro Provincial Office, Roxas, PDEA Calapan SIU, PNP-Drug Enforcement Group (PNP-DEG), NBI MIMAROPA, PNP PDEU-Oriental Mindoro, at 403rd B MC.
Nabili ng poseur-buyer mula sa PDEA Oriental Mindoro Provincial Office sa mga suspek ang isang (1) pirasong resealable transparent plastic pack sachet na naglalaman ng puting crystalline substance na hinihinalang shabu na tumitimbang ng MOL 250 gramo na nagkakahalaga ng Php1,500,000.
Narekober din sa mga suspek ang dalawang (2) pirasong vacuum-sealed transparent plastic packs na naglalaman ng puting crystalline substance na hinihinalang shabu na tumitimbang ng MOL 2 kilo na nagkakahalaga ng Php12,000,000; isang (1) pirasong genuine one thousand peso bill bilang buy-bust money, isang android phone; at isang sasakyan.
Ang mga nasabat na hinihinalang shabu ay nasa kustodiya ng PDEA Regional Office, 4B-MIMAROPA para sa pagsusuri habang ang nasabing mga suspek at iba pang ebidensya ay kasalukuyang nasa ilalim ng PDEA Oriental Mindoro Provincial Office para sa tamang disposisyon.
Ang Pambansang Pulisya katuwang ang iba’t ibang ahensya ng pamahalaan ay patuloy sa pagpapaigting ng kanilang kampanya kontra iligal na droga. Ito ay alinsunod sa isa sa pangunahing prayoridad ng administrasyon na labanan ang mga sindikato ng droga sa pamamagitan ng pagpigil sa kanilang mga iligal na aktibidad at pagbuwag sa kanilang mga operasyon.
Source: Roxas MPS
Panulat ni Patrolwoman Ana Rose D Guadaña
