Arestado ang magkapatid sa ikinasang operasyon ng Cotabato City PNP sa Purok Mapayag, Malagapas, Rosary Heights 10, Cotabato City nito lamang ika-28 ng Nobyembre 2024.
Kinilala ni Police Colonel Michael John Mangahis, Officer-In-Charge ng Cotabato City Police Office, ang magkapatid na sina alyas “Ammad” at alyas “Alnel” na naaresto sa bisa ng search warrant.
Naging matagumpay ang ikinasang operasyon ng City Intelligence Unit, Police Station 2, City Mobile Force Company, Regional Mobile Force Battalion 14, Regional Explosive Canine Unit BAR na nagresulta sa pagkakaaresto sa magkapatid at pagkakasamsam ng isang plastic bag na may lamang isang bala ng 40mm at 13 piraso ng 7.62 na bala.
Kasong paglabag sa Seksyon 5 ng Republic Act 10591 o “Comprehensive Firearms and Ammunition Regulation Act”, Seksyon 1 ng Republic Act 9516 o “Unlawful Manufacture, Sales, Acquisition, Disposition, Importation or Possession of an Explosive or Incendiary Device” ang isasampa laban sa magkapatid.
“Ang tagumpay ng operasyon ay patunay ng mas pinaigting na kampanya ng kapulisan laban sa kriminalidad, alinsunod sa layunin ng isang maayos, ligtas, at mapayapang Bagong Pilipinas”, pahayag ni PCol Mangahis.
Panulat ni Patrolwoman Ma. Señora J Agbuya
