Nadiskubre ng mga otoridad ang tinatayang Php180,000 halaga ng Fully Grown Marijuana Plants sa isinagawang marijuana eradication sa Sitio Bodo-an, Poblacion, Kibungan, Benguet nito lamang ika-29 ng Nobyembre 2024.
Ayon kay Police Colonel Joseph P Bayongasan, Provincial Director ng Benguet Police Provincial Office, naging matagumpay ang operasyon dahil sa pinagsanib na pwersa ng mga operatiba na pinangunahan ng Kibungan Municipal Police Station katuwang ang Provincial Intelligence Unit, Provincial Drug Enforcement Unit, Benguet Police Provincial Office, Regional Intelligence Division, Police Regional Office Cordillera at Philippine Drug Enforcement Agency.
Ang operasyon ay nagresulta sa pagkadiskubre ng tatlong plantasyon ng marijuana na may lawak na mahigit kumulang na 180 square meters at may nakatanim na mahigit kumulang 950 piraso ng Fully Grown Marijuana Plants na nagkakahalaga ng Php180,000 Standard Drug Price.
Bagamat walang nahuling cultivator, lahat ng binunot na Fully Grown Marijuana Plants ay naidokumento at sinunog sa mismong lugar.
Pinuri naman ni PCol Bayongasan ang mga operatiba sa kanilang matagumpay na operasyon at sinisiguro na lalo pa nilang paiigtingin ang kanilang kampanya kontra sa ilegal na droga.
Ang matagumpay na operasyon ng Benguet PNP ay patunay na kaisa ang Pambansang Pulisya sa pagpapaigting ng kampanya kontra ilegal na droga bilang pagsuporta sa adhikain ng administrasyon para sa isang mas mapayapang Bagong Pilipinas.
Panulat ni Patrolwoman Melba Langbis
