Tuluyan nang winakasan ang pakikibaka at kusang nagbalik-loob sa pamahalaan ang isang miyembro ng Communist Terrorist Group sa Barangay Cristina, Calubian, Leyte nito lamang Nobyembre 25, 2024.
Kinilala ni Police Lieutenant Colonel Marino Azur G Estonio, Force Commander ng 2nd Leyte Provincial Mobile Force Company, ang nagbalik-loob na si alyas “Podeboy”, 72 anyos at residente ng Barangay Manloy, Carigara, Leyte.
Ang pagbabalik-loob ay resulta ng matagumpay na pagsisikap at pakikipagnegosasyon ng mga tauhan ng 2nd Leyte Provincial Mobile Force Company kasama ang Leyte Provincial Intelligence Unit, Provincial Intelligence Team Leyte, Regional Intelligence Unit 8, 34th Special Action Company, 3rd Special Action Battalion, PNP-SAF, 805th Maneuver Company, Regional Mobile Force Battalion 8 at Carigara Municipal Police Station.
Isinuko rin ng nasabing surrenderee ang isang yunit ng home-made shotgun na may dalawang bala.
Samantala, nakatanggap naman ang nagbalik-loob ng agarang tulong pinansyal galing sa mga kapulisan.
Ang dating miyembro ng CTG ay nasa kustodiya na ng 2nd Leyte PMFC para sa dokumentasyon ng kanyang posibleng enrollment sa programa ng ating gobyerno na Enhanced Comprehensive Local Integration Program o E-CLIP.
Hinihikayat ng 2nd Leyte PMFC ang iba pang mga miyembro at tagasuporta ng CTGs na iwaksi na ang maling ideolohiya at magbalik-loob sa pamahalaan upang patuloy na sumuporta sa mga programa ng ating gobyerno tungo sa pagkamit ng isang payapa, ligtas at maunlad na Bagong Pilipinas.
Panulat ni Patrolwoman Ma. Elena B Singian
