Tinatayang Php170,000 halaga ng shabu ang nasamsam sa buy-bust operation ng Cainta PNP sa tatlong High Value Individual (HVI) sa Q Plaza Mall, Barangay San Isidro, Cainta, Rizal nito lamang ika-16 ng Nobyembre 2024.
Kinilala ni Police Colonel Felipe B Maraggun, Provincial Director ng Rizal Police Provincial Office, ang mga suspek na sina alyas “Pogi”, 37 taong gulang, residente ng Cainta, Rizal; alyas “Rizal”, 34 taong gulang, residente ng Taytay, Rizal; at “Rizza”, 30 taong gulang, residente ng Marikina City.
Naaresto ang mga suspek bandang 1:40 ng hapon sa isinagawang operasyon ng mga tauhan ng Cainta Municipal Police Station at nakumpiska mula sa mga suspek ang walong (8) pirasong sachet na naglalaman ng hinihinalang shabu na tumitimbang ng higit kumulang 25 gramo at nagkakahalaga ng Php170,000, isang calibre 9mm pistol na may apat na bala, isang coin purse, Php2,000 bill bilang drug money at Php1,500 bilang marked money.
Ang mga suspek ay nahaharap sa kasong paglabag sa Republic Act 9165 o “Comprehensive Dangerous Drugs Act of 2002” at RA 10591 o “Comprehensive Firearms and Ammunition Regulation Act”.
Ang matagumpay na operasyon ng kapulisan ng Rizal kontra ilegal na droga ay nagdudulot ng malaking pagbabago sa lipunan. Sa patuloy na pagsusumikap ng mga awtoridad, nababawasan ang krimen at nagiging mas ligtas ang ating komunidad. Ang kanilang dedikasyon at koordinasyon ay mahalaga upang makamit ang isang mapayapa at maunlad na bansa, malayo sa banta ng droga.
Source: Rizal Police Provincial Office
Panulat ni Patrolwoman Angelica Rica S Teng
