Nadiskubre ng mga otoridad ang tinatayang Php690,000 halaga ng Fully Grown Marijuana Plants at marijuana seedling sa isinagawang marijuana eradication sa Sitio Akiki, Tacadang, Kibungan, Benguet noong ika-4 ng Nobyembre 2024.
Ayon kay Police Colonel Joseph P Bayongasan, Provincial Director ng Benguet Police Provincial Office, naging matagumpay ang operasyon dahil sa pinagsanib na pwersa ng mga operatiba na pinangunahan ng Kibungan Municipal Police Station katuwang ang Provincial Intelligence Unit, Provincial Drug Enforcement Unit, Benguet Police Provincial Office, Regional Intelligence Unit 14, at Philippine Drug Enforcement Agency Cordillera.
Ang operasyon ay nagresulta sa pagkadiskubre ng tatlong plantasyon ng marijuana na may lawak na humigit kumulang na 336 square meters at may nakatanim na mahigit kumulang 1,650 na piraso ng Fully Grown Marijuana Plants at 9,000 na piraso ng marijuana seedling na nagkakahalaga ng Php690,000 Standard Drug Price.
Bagamat walang nahuling cultivator, lahat ng binunot na Fully Grown Marijuana Plants ay naidokumento at sinunog sa mismong lugar.
Pinuri naman ni PCol Bayongasan ang mga operatiba sa matagumpay na operasyon at sinisiguro na lalo pang paiigtingin ang kampanya kontra sa ilegal na droga.
Ang matagumpay na operasyon ng Benguet ay patunay na kaisa ang Pambansang Pulisya sa pagpapaigting ng kampanya kontra ilegal na droga bilang pagsuporta sa adhikain ng administrasyon para sa isang mas mapayapang Bagong Pilipinas.
Panulat ni Patrolwoman Charlyn Rose B Gumangan
