Nagsagawa ng inspeksyon si Police Brigadier General Redrico A Maranan, Regional Director ng Police Regional Office 3, sa mga sementeryo, bus terminals, at iba pang pampublikong lugar sa Central Luzon bilang paghahanda sa long weekend at paggunita ng Undas nito lamang Huwebes, ika-31 ng Oktubre 2024.
Personal na ininspeksyon ni PBGen Maranan ang ilang memorial parks sa rehiyon, kabilang ang Asccom Memorial Park sa Apalit, Pampanga, kasama si Police Colonel Jay C Dimaandal, Provincial Director.
Pagkatapos, nagtungo rin sa Bulacan upang suriin ang paghahanda ng mga awtoridad para sa inaasahang pagdagsa ng tao ngayong Todos Los Santos.
Naglagay rin ng police assistance desks sa mga pampublikong sementeryo at memorial parks sa tulong ng LGUs, volunteer organizations, at civic clubs, bilang bahagi ng mga seguridad na inilatag ng PNP.
Patuloy na nagpapaalala si PBGen Maranan sa publiko na sundin ang mga patakaran ng sementeryo at iwasang magdala ng ipinagbabawal na gamit upang masiguro ang maayos at ligtas na paggunita ng Undas.
Panulat ni Patrolwoman Lixen Reyz A Sawera
