Timbog ang isang 51 anyos na lalaki matapos makuhanan ng hindi dokumentadong baril sa isinagawang operasyon ng mga operatiba ng Parang Municipal Police Station sa Barangay Sarmiento, Parang, Maguindanao del Norte noong ika-28 ng Oktubre 2024.
Kinilala ni Police Major Blayn M Lomas-E, Hepe ng Parang MPS, ang suspek na si alyas “Allan”, 51 anyos at residente ng naturang lugar.
Ayon sa ulat, bandang 9:30 ng gabi nang makatanggap ng impormasyon ang naturang istasyon galing sa isang concerned citizen tungkol sa isang kahina-hinalang lalaking palakad-lakad na may dala-dalang baril.
Agad namang rumisponde ang COMPAC, Parang MPS upang beripikahin ang ulat.
Pagdating sa lugar, nadatnan ang suspek na may nakatagong baril sa kanyang beywang, agad naman itong nilapitan at hiningan ng mga kaukulang dokumento ngunit bigo itong ipakita na nagresulta sa pagkakaaresto ng suspek at pagkakakumpiska ng isang yunit na improvised single shot 12 gauge pistol.
Nahaharap sa kasong paglabag sa Republic Act 10591 o “Comprehensive Firearms and Ammunition Regulation Act” ang suspek.
Samantala, ang laban kontra kriminalidad ay patuloy na pinapaigting ng Maguindanao del Norte PNP alinsunod sa kampanya ng Bagong Pilipinas na panatilihin ang kapayapaan at kaayusan tungo sa pagsulong ng bansa.
Panulat ni Patrolwoman Veronica Laggui
