Tinatayang nasa Php952,000 halaga ng shabu ang nasamsam sa naarestong High Value Individual sa Cabrera Road, Barangay Dolores, Taytay, Rizal nito lamang ika-28 ng Oktubre 2024.
Kinilala ni Police Colonel Felipe B Maraggun, Provincial Director ng Rizal Police Provincial Office, ang suspek na si alyas “Jayson”, 21 taong gulang, residente ng Barangay San Juan, Taytay, Rizal.
Naaresto ang suspek bandang 12:27 ng madaling araw sa isinagawang buy-bust operation ng Rizal Provincial Intelligence Unit at nakumpiska mula sa suspek ang siyam (9) na pirasong pakete na naglalaman ng hinihinalang shabu na tumitimbang ng higit kumulang 140 gramo at nagkakahalaga ng Php952,000, ibang mga drug paraphernalia at isang sling bag.
Kasalukuyang nahaharap ang suspek sa kasong paglabag sa Republic Act 9165 o “Comprehensive Dangerous Drugs Act of 2002”.
Ang tagumpay ng Rizal PNP sa pagsugpo sa ilegal na droga ay mahalaga para sa pagkamit ng mapayapang komunidad. Sa pamamagitan ng kanilang masusing operasyon nababawasan ang kriminalidad at lumalakas ang tiwala ng publiko sa batas.
Source: Rizal Police Provincial Office
Panulat ni Patrolwoman Angelica Rica S Teng
