Tinatayang nasa mahigit Php30.6 milyon na halaga ng ilegal na droga ang nasabat ng Southern Police District mula sa isang tinaguriang High Value Target (HVT) sa Taguig City nito lamang Linggo, Oktubre 27, 2024 sa Barangay Western Bicutan, Taguig City.
Kinilala ni Police Brigadier General Bernard R. Yang, District Director ng Southern Police District, ang suspek na si alyas “Jhovel”, residente ng Bacoor, Cavite.
Ayon kay PBGen Yang, pinangunahan ng Drug Enforcement Unit ng Southern Police District, sa pakikipagtulungan ng Intelligence Division, District Mobile Force Battalion, Taguig City Police Station, Highway Patrol Unit at Philippine Drug Enforcement Agency ang buy-bust operation.
Nakuha mula sa suspek ang 4.5 kilo ng hinihinalang shabu na may estimated street value na Php30,600,000 at 6.9 grams ng hinihinalang cocaine na may estimated street value na Php36,570.
Nahaharap ang suspek sa kasong paglabag sa Section 5 at 11 ng Article ll ng RA 9165 o Comprehensive Dangerous Drugs Act of 2002.
Pinuri ni PBGen Yang ang magkasanib na pagsisikap ng mga operating unit para sa kanilang matagumpay na operasyon.
“Ang makabuluhang tagumpay na ito ay isang patunay ng walang-humpay na pangako at kasipagan ng ating mga opisyal laban sa iligal na droga.”
Panulat ni PSSg Remelin M Gargantos
