Tinatayang Php1,224,000 halaga ng shabu ang nakumpiska sa magkasintahan na drug suspek sa ikinasang joint buy-bust operation ng mga operatiba ng Regional Police Drug Enforcement Unit 10 at Cagayan de Oro Police Station 6 nito lamang Oktubre 6, 2024 sa Zone 1, Barangay Balubal, Cagayan de Oro City.
Kinilala ni Police Brigadier General Jayden C De Guzman, Acting Regional Director ng Police Regional Office 10, ang dalawang drug suspek na sina alyas “Rico”, 45 taong gulang na residente ng Manolo Fortich, Bukidnon at si alyas “Princess”, 20 taong gulang na residente ng Barangay Gusa, Cagayan de Oro City.
Nagresulta ang operasyon sa pagkakakumpiska ng 14 na piraso ng pakete ng hinihinalang shabu na may timbang na nasa 180 na gramo na may tinatayang Php1,224,000 halaga, isang sling bag, isang weighing scale, isang pitaka, cellphone at Php1,000 bill na ginamit bilang buy-bust money.
Nahaharap ang mga suspek sa kasong paglabag sa Section 5 at 11 ng Article II ng Republic Act 9165 o “Comprehensive Dangerous Drugs Act of 2002”.
Pinuri naman ni PBGen De Guzman, ang mga operating unit para sa matagumpay na operasyon kontra ilegal na droga. “Patuloy po ang inyong kapulisan sa rehiyon diyes sa kampanya kontra ilegal na droga. Hinihikayat ko po ang publiko na magmasid sa paligid at ireport ang anumang ilegal na aktibidades na makikita nila sa kanilang lugar.”
