Nasakote ang isang High Value Individual na nagresulta sa pagkakasabat ng tinatayang Php373,320 halaga ng shabu sa ikinasang joint operation ng Pasay City Police Station Drug Enforcement Unit at PDEA RO-NCR SDO nito lamang sa kahabaan ng Balagtas Street, Barangay 15, Zone 1, dakong alas-2:20 ng hapon nito lamang Sabado, Oktubre 19, 2024.
Kinilala ni Police Brigadier General Bernard Yang, District Director ng Southern Police District, ang suspek na si alyas “Lory”, 50 anyos, nakalista sa drugs watchlist bilang High Value Individual (HVI).
Nagresulta ang operasyon sa pagkakasamsam ng 54.9 gramo ng hinihinalang shabu na nagkakahalaga ng humigit-kumulang Php373,320, Php500 bill na genuine na may kasamang Php3,000 na pekeng pera na ginamit bilang buy-bust money, cellphone at iba pang drug parapernalia.
Nagsampa ng reklamo ang mga awtoridad laban sa suspek dahil sa mga paglabag sa Sections 5 at 11, Article II ng Republic Act 9165, na kilala rin bilang “Comprehensive Dangerous Drugs Act of 2002”.
Tiniyak ng SPD na patuloy lamang ang Southern Metro Cops sa pagpapaigting ng kampanya kontra ilegal na droga para sa ikabubuti ng ating bansa tungo sa isang Bagong Pilipinas.
Source: SPD PIO
Panulat ni PSSg Remelin M Gargantos
