Arestado ang isang taxi driver at dating job hire ng Janiuay LGU matapos mahulihan ng Php900,000 ng ilegal na droga sa buy-bust operation ng Provincial Drug Enforcement Unit (PDEU) sa Barangay Don T. Lutero West, Janiuay, Iloilo nito lamang ika-16 ng Oktubre 2024.
Kinilala ni Police Major Dadje Delima, Chief, PDEU, ang mga suspek na sina alyas “Hembra”, 41 taong gulang, residente ng nasabing barangay, at alyas “Latigo”, 42 anyos, nakatira sa Barangay Aguingay, Janiuay, Iloilo.
Ayon kay PMaj Delima, nakumpiska sa dalawang suspek ang kabuuang 125 gramo ng shabu na may Standard Drug Price (SDP) na tinatayang Php900,000 at Php7,100 buy-bust money at isang taxi unit.
Matagal na diumanong minamanmanan ng PDEU si alyas “Hembra” na dating job hire at si alyas “Latigo” na isang driver ng Taxi.
Ang dalawang suspek ay nahaharap sa kasong paglabag sa Republic Act 9165 o “Comprehensive Dangerous Drugs Act of 2002”.
Patuloy ang ating mga kapulisan na siguraduhin na mapanagot ang mga lumalabag sa batas upang masiguradong ligtas ang bawat isa, dahil sa bagong Pilipinas ang gusto ng pulis, ligtas ka!.
Source: Aksyon Radyo Iloilo
Panulat ni Pat Lyneth Sablon
