Nasabat ng pulisya ang tinatayang Php340,000 halaga ng ilegal na droga sa apat na drug suspek sa buy-bust operation na ikinasa ng mga tauhan ng Iloilo City Police Station 4 sa Zone 3, Barangay Boulevard, Molo, Iloilo City nito lamang ika-15 ng Oktubre 2024.
Kinilala ni Police Captain Ryan Christ C Inot, Officer-in-Charge ng Iloilo City Police Station 4, ang apat na naarestong suspek na sina alyas “Joseph”, 31 taong gulang, alyas “Mario”, 42 taong gulang, parehong residente ng nasabing barangay at naitala bilang mga High Value Individual, alyas “Graylord”, 39 taong gulang, residente naman ng Barangay Mabolo, Delgado, City Proper, at alyas “Emmanuel”, 51 taong gulang, na pareho naman na naitala bilang mga Street Level Individual.
Sa operasyon, nakuha sa mga suspek ang sampung sachets ng pinaghihinalaang shabu na tinatayang may bigat na 50 gramo, na may Standard Drug Price na umaabot sa tinatayang Php340,000. Bukod dito, nakuha rin ang Php7,000 na ginamit bilang buy-bust money.
Ang mga naarestong suspek ay nahaharap sa kasong paglabag sa Republic Act 9165 o “Comprehensive Dangerous Drugs Act of 2002”.
Ang operasyon na ito ay bahagi ng mas malawak na kampanya ng PNP laban sa ilegal na droga at ang mga suspek ay inaasahang haharap sa mga legal na proseso sa mga susunod na araw.
Ang mga lokal na awtoridad ay patuloy na nanawagan sa publiko na makipagtulungan upang masugpo ang problema sa ilegal na droga sa kanilang mga komunidad.
Source: Iloilo City Police Station 4
Panulat ni Pat Glydel V Astrologo
