Pormal Nang nanumpa at itinalaga si Police Colonel Charles L Domallig bilang bagong Force Commander ng Regional Mobile Force Battalion 15 (RMFB15) sa isang Turnover of Command Ceremony na ginanap noong Oktubre 9, 2024 sa PRO-CAR Log Cabin, Camp Major Bado Dangwa, La Trinidad, Benguet.
Pinangunahan ni Police Brigadier General David K Peredo, Jr., Regional Director ng Police Regional Office Cordillera Administrative Region (PRO-CAR), ang nasabing seremonya na dinaluhan ng iba’t ibang yunit at mga personalidad ng nasabing Police Provincial Office.
Sa seremonya, ipinasa ni Outgoing Force Commander Police Colonel Ruel D Tagel ang mga simbolo ng pamumuno, kabilang ang property book at mahahalagang dokumento, sa Incoming Force Commander na si Police Colonel Charles L Domallig, na nagmarka nang pormal na paglipat ng pamunuan.
Bilang bahagi ng kanyang pag-alis, nagpasalamat si PCol Tagel sa kanyang mga dating tauhan sa RMFB15 para sa kanilang walang sawang suporta at ngayon ay itinalaga bilang bagong City Director ng Baguio City Police Office.
Buong puso namang tinanggap ni PCol Domallig ang mga hamon ng kanyang bagong posisyon, binigyang-diin niya ang kahalagahan ng pagkakaisa at kooperasyon ng mga kapulisan at lokal na pamahalaan upang mapanatili ang kaayusan at kapayapaan sa rehiyong kanyang nasasakupan, bago ang kanyang kasalukuyang tungkulin, siya ay naglingkod bilang tagapamahala ng R8 sa rehiyon ng Cordillera.
Samantala sa kanyang mensahe, pinuri ni PBGen Peredo ang dedikasyon ng dalawang opisyal at binigyang-halaga ang kanilang serbisyo sa bansa.
“Binabati ko kayo pareho sa inyong walang kapagurang paglilingkod at dedikasyon sa mga prinsipyo ng Philippine National Police. Ang paglilipat ng tungkulin ay isang patuloy na pagtupad sa ating misyon na maglingkod at protektahan ang mamamayan”, ani PBGen Peredo.
