Nasamsam ng mga awtoridad ang Php142,000 halaga ng hinihinalang shabu mula sa magkapatid sa isinagawang buy-bust operation ng kapulisan ng Negros Oriental sa Purok 3, Barangay Calabnugan, Sibulan, Negros Oriental, noong ika-4 ng Oktubre 2024.
Kinilala ni Police Captain Jebert B Baroy, Chief ng Police Drug Enforcement Unit, Negros Oriental Police Provincial Office, ang magkapatid na mga suspek na sina “Gian”, 19 anyos at “Danny”, 37 anyos na parehong mga residente ng Barangay Bajumpandan, Dumaguete City.
Bandang 2:32 ng hapon ng ikinasa ng kapulisan ang naturang buy-bust operation na nagresulta sa pagkaaresto ng mga suspek at pagkasabat ng anim na plastic sachets ng hinihinalang shabu na may timbang na 21 gramo at may Standard Drug Price na Php142,000, buy-bust money, isang unit ng blue keypad cellphone, isang white belt bag, at isang unit ng black Kymco.
Mahaharap ang mga suspek sa kasong paglabag sa Republic Act 9165 o “Comprehensive Dangerous Drugs Act of 2002”.
Ang matagumpay na operasyon ay bunga ng pinagsanib-pwersa ng PDEU, PIU NOPPO, RID 7, PDEG DOU 7, RIU 7, Sibulan MPS at PDEA NORPO.
Ang Negros Oriental PNP ay walang tigil sa pagsasagawa at pagpapaigting ng kampanya laban sa mga gumagamit at nagbebenta ng ilegal na droga upang masiguro ang kaayusan sa kanilang nasasakupan dahil sa Bagong Pilipinas, ang gusto ng pulis, ligtas ka!.
Source: Negros Occidental PPO
