Matagumpay na isinagawa ang isang “Araw ng Serbisyo, Kalusugan, at Pagkakaisa; Liwanag at Pag-asa” sa Simunul, Tawi-Tawi nito lamang ika-5 ng Oktubre 2024.
Pinangunahan ni Police Major General Edgar Allan O Okubo, Acting Chief ng Directorial Staff, katuwang ang Metrobank PROTECT (Police Officers Responsible in Organizing, Transforming and Empowering Communities), Rotary Club ng Camp Crame, New Manila East, Makati Poblacion, Camp Panopio, at PNPA Tagapagpatupad Class 1992, Tawi-Tawi Police Provincial Office, Pamahalaang Panlalawigan ng Tawi-Tawi, Munisipyo ng Simunul.
Ayon kay PMGen Okubo, may mahalagang papel ang pakikipag-ugnayan sa komunidad para makamit ang pangmatagalang kapayapaan at seguridad. Inilahad niya ang kahalagahan ng Metrobank PROTECT sa pagpapataas ng kakayahan at serbisyo ng kapulisan, at binigyang-diin ang mga patuloy na pagsasaayos tulad ng pagpapa-renovate ng police precinct at paglalagay ng mga solar-powered light poles bilang patunay ng kanilang dedikasyon na protektahan at iangat ang mga komunidad tulad ng Simunul.
Kabilang din sa isinagawang aktibidad ang libreng serbisyong medikal, dental, dermatological, surgical, at optical para sa mga residente ng Simunul, Ceremonial Ribbon-Cutting at Unveiling ng Building Marker ng bagong renovate na Manuk Mangkaw Police Precinct.
Isinagawa rin ang isang seremonyal na pagbabasbas upang patuloy na gabayan ang tagumpay ng istasyon at Ceremonial Installation ng 28 Solar-powered Light Poles.
Ang mga ilaw na ito ay simbolo ng pag-asa at progreso, at magbibigay-liwanag sa mga kalye ng Simunul upang mas mapabuti ang kaligtasan at seguridad ng mga residente.
Patuloy naman ang buong hanay ng PNP katuwang ang ibang ahensya ng pamahalaan na magbigay ng agarang tulong, kasiguraduhan sa kalusugan, at masiglang pakikipag-ugnayan sa komunidad, na tumutugon sa adbokasiya ng Bagong Pilipinas tungo sa kapayapaan, seguridad, at kaunlaran.
Panulat ni Patrolwoman Ma. Señora J Agbuya
