Arestado ng mga operatiba ng Puerto Princesa City Police Office ang isang mangingisda na wanted sa kasong Frustrated Murder sa Barangay San Pedro, Lungsod ng Puerto Princesa nito lamang ika-1 ng Oktubre 2024.
Ang suspek ay kinilalang si alyas “Ram”, 36 anyos, mangingisda at residente ng Barangay Casian, Taytay, Palawan.
Nahuli ang suspek sa bisa ng Warrant of Arrest sa kasong Frustrated Murder ng pinagsanib na pwersa ng Intelligence Operatives ng PPCPO Mobile Force Company, sa koordinasyon ng mga tauhan mula sa Police Station 1, Police Station 5, PPCPO City Intelligence Unit, Taytay MPS, RMFB 401st B Maneuver Company, at PPCPO Tracker Team.
Nananatiling nakatuon ang Puerto Princesa City Police Office sa pagtiyak ng mabilis na paghuli sa mga indibidwal na sangkot sa iba’t ibang uri ng kriminalidad upang mapanatili ang kapayapaan at kaayusan sa lungsod.
Source: Puerto Princesa City Police Office
Panulat ni Patrolwoman Ana Rose D Guadaña
