Sa muling pagbubukas ng imbestigasyon ng PNP makalipas ang apat na taon sa pagpatay kay Retired General Wesley Barayuga na dating PCSO Board Secretary, mariing sinabi ni Police General Francisco D Marbil, Chief, Philippine National Police na “Walang sasantuhin ang PNP sa imbestigasyon sa pagpatay kay Retired General Wesley Barayuga”.
Ito ang pinaabot na mensahe sa pamamagitan ni Police Colonel Jean S Fajardo, Spokesperson ng PNP sa naganap na press briefing bandang hapon nito lamang Lunes, Setyembre 30, 2024 sa Camp Crame, Quezon City.
Samantala, sinibak naman sa pwesto si Police Lieutenant Colonel Santie Mendoza at Police Lieutenant Colonel Hector Frijaldo ng Philippine Drug Enforcement Group at pansamantalang naka-assign sa Personnel Holding and Accounting Unit upang bigyang daan ang muling pagbubukas ng imbestigasyon.
Magkakaroon ng backtrack ang PNP na pangungunahan ng Criminal Investigation and Detection Group (CIDG) at titingnan ang lahat ng anggulo kung sino ang nag-imbestiga, nagkaroon ba ng kapabayaan at pagtatakip lalo sa pag-iimbestiga sa naturang kaso.
Samantala, ipapatawag naman ng CIDG sina PLtCol Mendoza at Mr. Nelson Mariano, upang magbigay ng kanilang sworn written statement na malaking tulong upang umusad ang kaso.
Sa ilalim ng liderato ni PGen Marbil, makakaasa ang publiko na may mananagot dahil walang sino man ang mas mataas sa batas.
“Walang mangyayaring pagtatakip at hustisya ang ibibigay sa pamilya ni Retired General Barayuga,” dagdag ni PCol Fajardo.
Panulat ni PSSg Grace Neville L Ortiz
