Boluntaryong nagbalik-loob sa pamahalaan ang isang tagasuporta ng Communist Terrorist Group (CTG) sa mga tauhan ng 1st Zamboanga Sibugay Provincial Mobile Force Company katuwang ang Buug Municipal Police Station sa Buug, Zamboanga Sibugay nito lamang Linggo, ika- 29 ng Setyembre 2024.
Kinilala ni Police Lieutenant Colonel Ryan Jay R Capurcos, Force Commander ng 1st Zamboanga Sibugay Provincial Mobile Force Company, ang sumuko na si alyas “Bryan”, 36 anyos at residente ng Purok 5 Barangay Bulaan, Buug, Zamboanga Sibugay.
Si alyas “Bryan” ay aktibong tagasuporta ng CTG Affected Mass Organization (CAMO) Regional Urban Committeee, Zamboanga Sibugay Chapter WMPRC at nagbalik-loob sa pamahalaan sa pagnanais na mamuhay ng maayos at tahimik kasama ang kanyang pamilya.
Ang matagumpay na pagbabalik-loob nito ay dahil sa pagsisikap ng PNP para pababain at hikayatin ang mga kababayang nalihis ng landas. Sa ilalim ng programa ni Pangulong Marcos na naglalayong sugpuin ang insurhensiya, ang Pambansang Pulisya ay patuloy na hinihikayat ang mga natitira pang miyembro at tagasuporta ng Communist Terrorist Group na magbalik-loob sa pamahalaan at samantalahin ang programa nitong E-CLIP o Enhanced Comprehensive Local Integration Program at magkaisa tungo sa isang Bagong Pilipinas.
Panulat ni Patrolwoman Joyce Franco
