Nakiisa sa isinagawang 3rd Quarter Nationwide Simultaneous Earthquake Drill 2024 ang Police Regional Office 9 bandang 9:00 ng umaga nito lamang Setyembre 26, 2024 sa Camp Gen Eduardo Batalla RT Lim, Zamboanga City.
Nakiisa rin sa aktibidad si Police Colonel Diomarie S Albarico, Chief ng Regional Police Community Affairs and Development Unit (RPCADU) 9, katuwaang ang Zamboanga City Disaster Risk Reduction and Management Office na nagbigay ng mga mahalagang impormasyon at gabay tungkol sa mga dapat gawin bago, habang, at pagkatapos ng lindol. Ang layunin ng drill ay upang mas mapabuti ang kahandaan ng PNP sa pagresponde sa mga sakuna, lalo na sa mga lindol na maaaring magdulot ng pinsala sa komunidad. Sa pamamagitan ng pagsasanay na ito, nagkaroon ng pagkakataon ang mga kalahok na masanay sa tamang mga hakbang na dapat gawin sa oras ng kalamidad. Nagkaroon ng pagsasabuhay ng sitwasyon tungkol sa kahandaan ng isang indibidwal sa oras ng sakuna lalo na ang lindol. Bukod pa dito, nagkaroon ng aktwal na pagresponde sa isang biktima at kung paano ito bigyang lunas ng first aid. Ang buong partisipasyon ng mga nakilahok ay isang patunay na nagpakita ng pagtutulungan ng PNP at mamamayan upang maiwasan na magkaroon ng casualties pagtumama ang malakas na lindol. Ang 3rd Quarter Nationwide Simultaneous Earthquake Drill 2024 ay bahagi ng mas malawak na programa ng pamahalaan upang mapalakas ang disaster preparedness at resiliency ng bansa, na mahalaga lalo na sa mga lugar na madalas tamaan ng lindol. Hinimok din ang mga nakilahok na mas maging mapagmatyag at maging handa sa lahat ng pagkakataon tungo sa mas ligtas, payapa, at maunlad na Bagong Pilipinas. Panulat ni Patrolwoman Joyce Franco
