Kabilang sa Top 10 Finalist ang pambato ng Police Regional Office 13 na si Police Staff Sergeant Irish Joy Laureto sa isinagawang “Singing Cops for a Cause 2024” na isinagawa noong ika-10 ng Setyembre at muling lalaban para sa Grand Finals na gaganapin sa Music Museum, San Juan City, Metro Manila sa Setyembre 27, 2024.
Itinanghal bilang Top 10 si PSSG Irish Joy A Laureto, 31 anyos, Band Vocalist ng PRO 13, tubong Cabadbaran City mula sa “Class 2015-01 Alagad” ng Regional Mobile Force Battalion 13 na itinalaga bilang Strategy Review Police Non-Commissioned Officer (PNCO) na nagpamalas ng kanyang natatanging talento sa larangan ng musika na kabilang sa labing-pitong (17) manlalahok mula sa iba’t ibang pambato ng Rehiyon.
Ang proyektong ito ay inilunsad bilang isang natatanging inisyatibo ng Philippine National Police sa pamamagitan ng PNP Officers Ladies Club Foundation, Inc. na pinamagatang “Singing Cops for a Cause” na kung saan ay makakatanggap ang itatanghal na kampeon ng Php100,000 cash at ang malilikom na pera ay ibibigay sa mga kasalukuyang lumalaban sa malubhang sakit na cancer.
Layunin ng nasabing programa ng PNP ay hindi lamang ipakita ang kakayahan ng mga kapulisan sa pagpapatupad ng batas o pagpapakita ng natatanging talento, kundi pati ang kanilang pagiging malasakit sa pagtulong sa mga nangangailangan, partikular sa mga cancer patients na pangunahing benepisyaryo sa nasabing programa.
Patuloy ang Pambansang Pulisya ng Pilipinas sa iba’t ibang bahagi ng bansa upang makiisa sa iisang layunin sa pagsugpo sa katiwalian at pagpapalakas ng integridad sa pampublikong serbisyo hindi lamang para makamit ang personal na tagumpay kundi unahin ang kapakanan ng publiko tungo sa isang maayos at ligtas na Bagong Pilipinas.
Panulat ni Patrolwoman Karen Mallillin
