Tinatayang Php2 milyong halaga ng Fully Grown Marijuana Plants ang nadiskubre sa isinagawang marijuana eradication sa Barangay Basao, Tinglayan, Kalinga nito lamang ika-19 ng Setyembre 2024.
Ayon kay Police Colonel Gilbert Fati-ig, Provincial Director ng Kalinga Police Provincial Office, matagumpay ang operasyon dahil sa pinagsanib pwersa ng mga operatiba sa pangunguna ng Provincial Drug Enforcement Unit / Provincial Intelligence Unit katuwang ang Tinglayan Municipal Police Station, 1st Provincial Mobile Force Company Kalinga Police Provincial Office; Regional Mobile Force Battallion 15; at Philippine Drug Enforcement Agency- Kalinga Police Office.
Nagresulta ang operasyon sa pagkadiskubre ng isang plantasyon ng marijuana sa isang communal forest na may tinatayang lawak na 1000 square meter na may tanim na humigit kumulang 10,000 piraso ng Fully Grown Marijuana Plants na nagkakahalaga ng Php2,000,000 Standard Drug Price.
Bagamat walang nahuling cultivator, binunot at sinunog ng mga operatiba ang pinagbabawal na tanim sa mismong lugar.
Ang matagumpay na operasyon ng Kalinga PNP ay patunay na kaisa ang Pambansang Pulisya sa pagpapaigting ng kampanya kontra ilegal na droga bilang pagsuporta sa adhikain ng administrasyon para sa isang mas mapayapang Bagong Pilipinas.
