Matagumpay na nakapasok si Police Corporal Lyka Princess Ubando Dela Cruz, Assistant Operation PNCO ng Liliw Municipal Police Station sa Top 10 Finalist ng Singing Cops of the Philippines 2024 na gaganapin sa Setyembre 27, 2024.
Ayon sa panayam kay PCpl Dela Cruz, bata pa lamang siya ay nakahiligan na niya ang umawit at isa sa mga naging impluwensya nya sa pagkanta ay ang kanyang ama.
Nag-umpisa siyang sumali sa mga maliliit na singing contest sa kanilang paaralan at mga barangay amateur singing contest nung siya ay tumungtong na ng sekondarya.
Nang siya’y maging isang ganap na pulis doon naman mas nahasa pa ang kanyang talento sa pag-awit sapagkat isa sya sa mga bokalista ng Laguna Police Provincial Office Band.
Si PCpl Dela Cruz ay ipinagmamalaking pambato ng Police Regional Office 4A sa kanyang angking talento sa pag-awit ng may puso.
Ang programang ito ng Philippine National Police ay mahalaga dahil nagtataguyod ito ng pagkakaisa at kumpiyansa sa hanay ng mga pulis. Nakapagbibigay din ito ng pagkakataon para maipamalas ang talento ng mga alagad ng batas na nagpapalakas ng morale at inspirasyon sa kapwa nila. Bukod dito nagsisilbi itong paraan para makipag-ugnayan sa komunidad na nagtataguyod ng tiwala at kooperasyon.
