Tiklo ang isang lalaki matapos makuhanan ng mga ilegal na droga at granada sa ikinasang search warrant operation ng PNP sa Purok 2, Barangay Banayal, Tulunan, Cotabato kaninang umaga ng Setyembre 17, 2024.
Kinilala ni Police Captain April Rose R Soria, Officer-In-Charge ng Tulunan Municipal Police Station, ang suspek na si alyas “Ed”, 29 anyos at residente ng nasabing lugar.
Ayon kay PCpt Soria, bandang 7:30 ng umaga nang sinalakay ng mga awtoridad ang mismong tahanan ng suspek at dito nasamsam ang anim na pakete ng pinaghihinalaang shabu na may timbang na tatlong gramo na nagkakahalaga ng Php18,500 at isang hand granade.
Ang suspek ay mahaharap sa kasong paglabag sa Republic Act 9165 o “Comprehensive Dangerous Drugs Act of 2002”.
Samantala, patuloy ang buong hanay ng PNP sa kampanya laban sa ilegal na droga upang mapanatili ang kaayusan at kapayapaan ng ating bansa.
Panulat ni Pat Flora Mae Asarez-RPCADU 12
