Kalaboso sa isinagawang buy-bust operation ng Taguig City Police Station Drug Enforcement Unit ang isang 50 anyos na lalaki makaraang makuhanan ng malaking halaga ng shabu nito lamang Martes, Setyembre 10, 2024.
Kinilala ni Police Brigadier General Leon Victor Z Rosete, District Director ng Southern Police District, ang suspek na si alyas “Thes”, 50 anyos.
Ayon sa ulat, nangyari ang operasyon bandang 10:15 ng gabi na nagresulta sa pagkakasamsam ng mga awtoridad ng 13 piraso ng heat-sealed transparent plastic sachets na naglalaman ng pinaniniwalaang shabu na humigit-kumulang 15.99 gramo ang bigat at tinatayang nasa Php108,732, Php500 bill na ginamit bilang buy-bust money, isang black coin purse, at isang maliit na weighing scale.
Pormal namang inihahanda ang reklamo laban sa naarestong suspek para sa paglabag sa Sections 5 at 11, Article II ng Republic Act 9165 (Comprehensive Dangerous Drugs Act of 2002).
Ang Southern Metro Cops ay tinitiyak na masupil ang mga sindikato ng ilegal na droga sa Southern Metro upang makamit ang isang ligtas at maunlad na pamayanan.
Source: SPD PIO
Panulat ni PSSg Remelin M Gargantos
