Arestado ang dalawang lalaki matapos madakip sa isinagawang follow-up at hot pursuit operation ng mga tauhan ng Paranaque City Police Station bandang 8:30 ng gabi sa Barangay Sun Valley, Parañaque City nito lamang Biyernes, Setyembre 6, 2024.
Kinilala ni Police Brigadier General Leon Victor Z Rosete, District Director ng Southern Police District, ang mga suspek na sina alyas “Robert”, 32 anyos, at alyas “Glenn”, 37 anyos.
Ayon sa ulat, nag-ugat ang insidente makaraang puwersahan kinuha ng mga suspek ang motorsiklo sa biktimang si alyas “Jameson”, 19 anyos bandang 3:00 ng madaling araw ng Biyernes, sa Sta. Ana, Sun Valley, Parañaque City.
Agarang nagsagawa ng operasyon ang mga tauhan ng District Special Operations Unit katuwang ang Sub-Station 7 ng Parañaque City Police Station na nagresulta sa pagkakadakip sa mga suspek.
Nakumpiska sa mga ito ang pulang/itim na Honda Click 125 na motorsiklo, photocopy ng Certificate of Registration (CR) at Official Receipt (OR) ng nasabing motorsiklo, isang Armscor 202 SPL Caliber .38 revolver na walang serial number, at limang bala para sa Caliber .38 revolver.
Nahaharap ang dalawang suspek sa kasong paglabag sa New Anti-Carnapping Act of 2016 (RA 10883) at ang Comprehensive Firearms and Ammunition Regulation Act (RA 10591).
Ang SPD ay hindi kukunsintehin ang ganitong mga insidente at pananagutin sa saligang batas ng Pilipinas ang lahat ng magkakasala upang mapanatili ang ligtas at tahimik na komunidad.
Source: SPD PIO
Panulat ni PSSg Remelin M Gargantos
